Header
Home>> Articles  

 

 

 

 

 

 

 

 

Purani Film

The chequered history of Pakistani film industry is interspersed with many vicissitudes. Starting almost from a scratch soon after the political division of the Sub-continent. The factors which contributed to the decline of Pakistan film industry were, the loss of East Pakistan territory, the inception of Television, and the infiltration of non-artistic financiers. In this Page you will read a article Purani Film In Urdu and Roman Urdu.

Purani Film In Urdu

Kiya Purana Filmi Daur Wapas Aa Sake Ga?

Purani Film Image

Purani filmon ka daur bhi kiya khoob huwa karta tha, aik adad Hero nehayat he shareef-ul-nafs, roman parwar aur amooman ghareeb. jo chalis saal ki umar mein khushi khushi ghar aa kar apni maa ko B-A mein paas hone ki khushkhabri deta hai. Aik shokh Heroin, jo bharhkeele libaas aur tez make up ke bawajood aehmaqana had tak masoom. Hero agar ghareeb hai to formula ke mutabiq heroin ko ameer kabeer hona chahite. Comedy ke liye hero ka dost ya heroin ke ghar ka mulazim. Drama aur jazbati scene ke liye hero ki borhi bewah Maa. Villan ke liye heroin ka baap ya baap ka koi rishtedaar. Rang bharne ke liye club mein ek do hosh ruba raqs aur ek adad piano lazmi hua karta tha, jis par beth kar hero ya heroin ko koi ek khoobsurat gana zaroor gana hota tha. Us zamane mein gane ki shaiyri aur dhun banane par barhi tawajja di jati thi. Mehdi Hasaan, Madam Noor Jahan, Ahmed Rashdi, Naheed Akhter, A Nayyar ki awaz mein madhur geet tayyar kiye jate the. jin ki maqbooliyat aj tak qaim hai.

Isi tarha mukalme bhi nehayat umdah, meyari aur mohazzib hua karte the, bas ye hai ke fight scene mein dhishon dhishon ke sound effect bawa adam ke zamane se he chale aa rahe hai. Guzarte waqt ke sath sath filmon mein bhi tabdeeli aai. Ache hidayatkaar aur film saaz na rahe, badmaash aur ghunda culture filmon par ghalib aa gaya, gandasa ne tamam iqdaar ka kaat phenka aur filmon se tehzeeb uth gai. Jab ye soort-e-haal hui to ek spot boy ko bhi film direct karna aa gaya. Us ne apne zehan aur meyar ke mutabiq filmen banai, jis ke nateeje mein filmon mein meyari script ki jagah fehash kalmaat, khoobsurat geeton ke bajae gher shaista aur behooda gane, barish mein heroin ke behangam uchal kood aur jazbaat, nigari ke bajae bazaaripan ka riwaaj aam ho gaya. Is jahalat aur ghund culture ke baiys filmen zawal pazeer ho gai. Urdu zubaan mein to filmen banna he taqreeban band ho gai, studio veeran ho gae, cinema khatam ho kar shopping plaza mein dhal gae, magar hamare film saazon ko hosh na aya. Filmon ki zabo hali ka asar fankaron par parha aur Javed Sheikh, Sanjeeda, Bahaar Begum, Deeba, Mustafa Qureshi, Resham, Meera, Muammer Rana, Nargis, Sahiba, Jaan Rambo, Nadeem, Ghulam Mohi Uddin samet kae fankaron ne barhi screen se choti screen ka rukh kar liya.

Aesa nahi ke hamare pas talent ki kami hai ya hamare fankaar kisi se kam hai. Masla ye hai ke achi filmen banane walon ki kami hai. Le de kar ek Syed Noor hai, jinho ne “ Chooriyan ” aur “ Majajan ” jesi umdah filmen banai hai ya phir Shoaib Mansoor hai, jinho ne “ Khuda ke liye ” aur “ Bol ” bana kar kamiyabi ke nae record qaiym kiye. Magar sirf ek aadh hidayatkaar pori industry ka bojh nahi utha sakta. Shaan jese behtreen adakar ko hamare nadaan film sazon ne gandase mein uljha kar zaya kar diya. Shaan bilashuba bohat acha fankaar hai. Jo agar mauqa mile to apne aap ko Hollywood mein bhi manwa sakta hai. Magar kehte hai ke heere ki qadar johri janta hai. Shaan bhi ek heera hai, jise kisi johri ki talash hai. Filmi sanat ko bohraan se nikalne ke liye hukoomat aur senior board ko chahiye ke badmashon ke naamon aur kaamon par banne wali filmon par pabandi aaiyd karen, leecharhpan ke khatme ke liye qawaneen-o-zaah karen aur Urdu zubaan mein filmen banane walon ki hausla afzaai karen, ta ke filmen gunda gardi aur gandase ki afriyat se nikal saken.

Filmon ki baat ho rahi hai to zara Salma Aagha ka bhi zikar ho jae, jinho ne Pakistani aur Bharti filmon mein adakari aur gulokari ki. Salma Aagha ke gher mamooli husn ke charche aaj bhi hai. Ab suna hai un ki Beti bhi filmon mein kaam kar rahi hai. Apni waldah ki tarha unho ne bhi Bharti filmon se apne career ki ibtedah ki. Magar in ki jo tasaveer shaya ho rahi hai, wo apni waldah ke andaaz se qattai mukhtalif hai. Salma Aagha ki Sahib Zaadi ki tasaveer dekh kar ye nahi lagta ke wo kabhi kisi Pakistani film mein bhi kaam karengi. Kyun ke jis huliye mein wo Bharti filmon mein jalwah gar ho rahi hai. Wesa andaaz agar yahan apnaya to is baat ka darr hai ke kahi log ishteaal mein aa kar cinema ghar ko he aag na laga den. Yahan mein Zeba Bakhtiyar ki tareef karna chahoongi, jinho ne Bharti filmon mein kaam zaroor kiya, magar Pakistaniyon ka sar sharam se jhukne na diya. Zeba Bakhtiyar ko apne zamana-e-urooj mein jaisi shohrat mili. Us ka andaza maujooda daur ki adakaraen nahi laga sakti. Tahum Zeba se itna zaroor seekh sakti hai ke kamiyabi ka daromadar sirf performance aur salahiyat par hota hai. Jis mein zahiri khoobsurti beshak aeham hai. Magar ba-waqar andaaz he aurat ko qabil-e-takreem banata hai. Agar log ye samajhte hai ke bold hone se naam hoga to un ke liye arz hai ke, agar aaj aesa hota to Aishwariya Rai aur Kareena kapoor ke bajae Veena Malik, Rakhi Sawant, Meera ya Malika Sharawat Bharat ki No.1 heroin hoti.

Abida Perveen Alhaj Muhammad Siddiqui Ismail Exersice Tips

 

 

More Links

 

 

Copy Right 2012-2014 www.Meriduniya11.com Contact Us