Header
Home>Interview  

 

 

 

 

Ali Zafar

Ali Zafar was born on 18 May, 1980. He is a singer and he has awsum voice. He sings the songs beautifully. He is working in India also. Now he is a film actor. He worked in three films as a leading role. He did very good job in the film and also composed and sung the songs of films. He ia a great artist. He is very good looking, smart and handsome personality. He is married and his Wife’s name is Aisha.In this page you will read Pakistani Famous Singer Ali Zafar Interview In Pakistan In Urdu, Hindi and Roman Urdu.

Ali Zafar Interview In Pakistan

Ali Zafar Photo

Ali zafar ke bare mein kuch likhna goya suraj ko chiragh dikhane ke barabar hai. Shohrat, daulat aur izzat to bohat log hasil kar lete hai, lekin Ali Zafar ne diyar-e-ghair mein kamiyabi ka jhanda gharhne ke bawajood apni gardan mein tanaao nahi aane diya aur na he Ali se koi aesi harkat sarzad hui, jo kisi bhi aetebar se ek sache pakistani ke liye baisey nidamat hoti. wo barhe waqar aur shaistegi ke sath Bollywood mein milne wali kamiyabi ko samette hue Bharti media ke chubhte hue sawalon ka samna kar rahe hai. un ki dil aawez muskurahat aur chehre ki narmi barhe se barhe kaiyan journalist ko ghutne tekney par majboor kar deti hai. yehi wajah hai ke aj Bollywood mein Ali Zafar ka naam izzat-o-aehteram se liya jata hai. bahesiyat adakar unki 3 filmen release ho chuki hai aur wo ek aur film chashm-e-baddor mein kaam kar rahe hai. Is ke sath he unhe ye aezaaz bhi hasil hua ke “ London Paris Newyork ” mein markazi kirdar ada karne ke ilawa, Ali ne film ka Music bhi tarteeb diya. Songs gae aur aur us ke naghme bhi likhe. Ali Zafar ko kamiyabiyon ka ye safar mubarak ho.

Question : Kiya wajah hai ke ab Pakistani Singer bila khauf-o-khatar Bollywood ka rukh kar rahe hai?

Ali Zafar: Main samajhta hoon ke fun se mohabbat aur lagao, kuch kar dikhane ka jazba aur apni behtreen salahiyaton ka izhaar, har artist ki fitri khuwahish hoti hai. aik barhi aur sargaram industry hone ki wajah se bollywood mein ase artiston ko welcome kiya jata hai. Wahan kaam karne ke bohat ziada mawaqey hai aur aese kae projects chal rahe hai jo har shakhs ko is janib khenchte hai. Agar hum Pakistani artists Adnan Sami, Rahat Fateh Ali Khan, Shafqat Amanat Ali aur Atif Aslam ki baat karen to wo bharat aane se pehle he barha naam kama chuke the. Unhe ye shohrat aur shanakht Pakistan se he mili. Pakistan mein ek artist ke pas apni salahiyaton ke izhaar ke mawaqe bohat mehdood hai aur us ke liye use mulk se bahar nikalna parhta hai.

Question : Aap ne actor banne se bohat pehle apna career bator singer shuru kiya, ye ap ko kab maloom hua ke adakar bhi ban sakte hai?

Ali Zafar: G o ke music hamesha se mera shauq raha hai lekin ye janta tha ke actor ban sakta hoon, main ne bohat arsa pehle TV par acting ki thi. Is ke ilawa apne music album mein bhi kuch character kiye. Mujhe adakari ka acha tajurba tha lekin kabhi is ke bare mein sanjeedgi se nahi socha. Main ne soch rakha th a ke agar kabhi acting karna parhi to wo feature film ke liye hogi. Phir “Tere bin ladin” mein kaam karne ki offer hui aur is tarha mere acting career ka aaghaz hua.

Question : Apne “London Paris Newyork” mein adakari ke sath music bhi compose kiya, ye batae bek waqt dono zimedariyan kis tarha nibhae?

Ali Zafar: Mera khayal hai ke ek din mein hamare pas kafi waqt hota hai aur agar ap gher zaroori kamon mein waqt zaya na karen to yaqeeni tor par apna kaam pora kar sakte hai. Go ke ye mushkil tha magar apko mehnat kar ke muqarrara waqt mein kaam mukammal karna hota hai. Main apne apko sirf itna credit deta hoon ke mujhe maloom hai ke kya kaam kiya hai aur kya nahi. Kis kaam ko bakhoobi anjaam de sakta hoon aur kis kaam ko nahi. Agar apko ye aetemad ho ke ap is kaam ko bakhoobi anjaam de sakte hai to apko kaam karte waqt koi dushwari nahi hoti. Mujhe apni kamzoriyon aur taqat ka andaza hai aur un ke mutabiq apna plan tayyar karta hoon.

Question : Media mein ap ke aur Aditi rao ke lip lock ka bohat charcha hua, asal haqeeqat kya hai?

Ali Zafar: Film dekhne ke bad apko andaza ho gaya hoga ke logon ne raai ka paharh bana diya. Main ek shadi shuda shakhs hoon aur nahi samajhta ke pardeh par kisi larki ke sath lip locking koi munasib baat hogi. Mujhe is baat ka pora ehsaas hai ke log mujhe pardeh par kiss karta hue dekh kar mere bare mein kya sochenge. Is film mein mere aditi ke sath kuch jazbati scene hai, lekin unhe film ki zaroorat samjha ja sakta hai.

Question : Aap ko “ Teen Patti ” mein kaam karne ki offer hui thi jise ap ne waqt ki kami ki wajah se qabool nahi kiya tha, Amitabh Bachan ke sath kaam karne ka afsoos nahi hai, jise ap apna ideal samajhte hai?

Ali Zafar: Main nahi samajhta ke Amitabh ke sath kaam karne ka aakhri mauqa tha. Mujhe umeed hai ke mustaqbil mein aese kae mawaqe milenge. Amitabh Bachan se be-had mutaasir hoon, unho ne tareekh mein apna naam banaya hai. Main un ka dil se aehteram karta hoon. Unhe apne bachpan se filmon mein kaam karta dekhta aa raha hoon aur mujhe ehsaas hai ke un se bohat kuch seekha hai.

Question : Aap Bollywood industry mein dosre kin film star se mutaasir hai?

Ali Zafar : Mujhe Shahrukh Khan bohat pasand hai, wo bohat he khas shakhs hai. Jab kabhi un se mila to mein ne un ke ird gird ek khas energy mehsoos ki aur chaha ke un mein se thori si taqat mein bhi jazb kar loon. Amir Kham ko filmon ki bohat samajh hai, mujhe un ki zahanat bohat achi lagti hai aur chahta hoon ke mujh mein un jesi zahanat aa jae.

Question : Aap ke khayal mein is waqt Bollywood ka sab se versatile actor kon hai?

Ali Zafar: Main samjhta hoon Ranbir Kapoor is waqt sab se versatile actor hai. Mujhe Rockstar mein un ka kaam bohat pasand aya. Is film ka music bhi bohat acha tha. Main ne Ranbir ki Wake up Sid bhi dekhi hai, aur ab tak Ranbir ka jitna bhi kaam samne aya hai, use dekh kar Ranbir ko versatile actor kaha ja sakta hai.

Question : Ao ki masroofiyat aur musalsal travelling ko dekhte hue khayal aata hai ke ap apni zaati aur professional zindagi mein kis tarha tawazun barqarar rakhte honge?

Ali Zafar: Zindagi mein kuch bhi aasaan nahi hota, isi liye mein is ke har lamhe se lutf andooz hone ki koshish karta hoon. London Paris Newyork ki shooting ke silsile mein Paris gaya to mein ne apni Biwi Aisha ko bhi wohi bulwa liya. Hamare darmiyan bohat wonderful relationship hai aur woh meri zindagi mein aik aeham sutoon ki aehmiyat rakhti hai. Us ne qadam qadam par mujhe support kiya hai aur meri zindagi mein tawazun barqarar rakhne mein us ka aeham kirdar hai. Main din mein shooting karta aur raat mein use le kar ghoomne bahar chala jata. Mujhe yaad hai ke ek din main use romantic candle light dinner ke liye Cruise par le gaya tha. Bas isi tarha main apne khoe hue waqt ki talafi karne ki koshish karta rehta hoon.

Question : Aap ki shadi ko dhai saal se zada ka arsa ho chuka hai, ye batae kamiyab azdawaji zindagi ka kiya raaz hai?

Ali Zafar: Mere khayal mein hamen apne partners ko khushiyan dene ki koshish karni chahiye, dono ko maloom hona chahiye ke wo ek dosre ko kaise khush rakh sakte hai. Main samajhta hoon ke aam tor par logon se yehi ghalti hoti hai, ke wo khud khushi faraham karne ke bajae dosre fareeq par inhesaar karte hai. Is ke bajae unhe khud zaati tor par sathi ko khush rakhna chahiye aur samajh lena chahiye ke wo khud in khushiyon ke liye jawab dey hai.

Question : Pehli bar ap ne kab mohabbat ki?
Ali : Main nahi janta ke wo mohabbat thi ya nahi, bas itna yaad hai ke 16 saal ki umar mein apni classfellow ko propose kar diya tha. Main ne ek cassette mein kuch purane gane aur apni awaz shaeyri record ki aur ek mushtarka dost ke zariye use bhej diya, lekin us ne wo cassette lene se inkaar kar diya.

Question : Kiya aap “ London Paris Newyork ” ki box office par performance se mutmaiyn hai?

Ali Zafar : ji haan, main is film ke business se bohat ziada mutmaiyn hoon, is film ka box office result wesa he baraamad hua jesa main ne tassawur kiya tha aur jesa use hona chahiye tha. Is ki box office aamdani meri tawaqqa se ziada rahi, khas tor par opening collection to bohat he shandaar the.

Question : Aap ne apne career ke dauran pehli bar is film mein Aditi Rao ke sath kissing scene shoot karwaya. Ek Pakistani actor hone ke natey ap par is hawale se aeteraaz ho sakta hai. Ap apni safai mein kuch kehna chahenge?

Ali Zafar: Pehli baat to ye ke Bollywood ki filmon mein kissing scene ka jo tassawur hai, ye usse bilkul hat kar hai aur ise barhi aehtiyat se shoot kiya gaya hai. Aur main kabhi aesa kaam nahi karonga jis ki wajah se mujhe apne paristaron ke samne sharminda hona parhe.

Question : Kuch logon ka khayal hai " London Paris Newyork" ne bohat acha start liya tha lekin us ke sath release hone wali “ Paan singh tou maar ” ki gher mutawaqqa kamiyabi ne ap ki film ko mutaasir kiya aur ye film tawaqqa ke mutabiq box office par kamiyabi hasil na kar saki, aap is bare mein kya kehte ho?

Ali Zafar: Dono filmen ek dosre se bilkul mukhtalif thi aur mein nahi samajhta ke in mein se koi ek dosre par mutaasir hui ho. Mere khayal mein hamari film ne bohat acha businees kiya hai aur main is ke box office nataiyj se mutmaiyn hoon.

Question : In dino Veena Malik bhi Bharat main hai air apni gher mamooli harkaton ki wajah se shey surkhiyan mein jagah paa rahi hai, khas tor un ki tasaveer par bohat kuch kaha aur likha gaya, aap is bare mein kya kahenge?

Ali Zafar: Mere khayal mein har ek ko apne salahiyaton ke izhaar ki azaadi hai aur wo use jis andaaz mein chahe pesh karen, main is par koi tasarah karna munasib nahi samajhta.

Question : Kiya ap ko Bharat mein is pazeerai ki tawaqqa thi?

Ali Zafar: Main alfaaz mein beyan nahi kar sakta ke Bharat ke logon ne mere sath kitna acha sulook kiya, ye sab kuch meri tawaqquaat ke bar-aks tha.

Question : Is film mein ap ka pair Aditi Rao ke sath banaya gaya tha, jinho ne pehli bar kisi film mein lead role play kiya. Un ke sath kaam karne ka tajurba kesa raha?

Ali Zafar: Main samajhta hoon ke wo bohat he talented actress hai aur unho ne barhi khoobi se apna role adaa kiya hai, unhe yaqeenan usse bhi ziada acha kaam karna chahiye tha. Wo mehaz ek khobsoorat chehra he nahi bal ke bohat achi adakara hai. Main harean hoon ke us se ziada kaam kyun nahi liya gaya.

Question : Is film mein pehli bar Aditi ne ek gana bhi gaya hai, as a music composer ap ne unhe training dene ki zaroorat mehsoos ki?

Ali Zafar: Ek ache singer ke liye riyaz bohat zaroori hai. To is liye main ne bhi unhe riyaz rozana karwaya. Un mein qudrati salahiyat hai aur unhe sirf gana yaad karna hota hai. Main samajhta hoon ke unhe acting ke sath sath singing par bhi tawajjah markooz karni chahiye.

Question : Aap ne is Film ke gane bhi likhe hai, ap ko ye kaam kitna aasaan ya mushkil laga?

Ali Zafar: Mujhe likhna hamesha se he pasand hai aur main ne apni solo albums ke geet khud he likhe hai, albatta kisi film ke liye situation ke mutabiq naghmaat likhna ba-zaatey khud ek fun hai. Jab main likh raha hota hoon to sirf mujhe tanhaai ki zaroorat hoti hai.

Question : “London Paris Newyork” mein music dene ka mauqa kese mila?
Ali : Producers Goldi Behl aur shrishti, director Anu Memon ke sath film ke kisi gane par discuss kar rahe the. Main ne us ki dhun ke bare mein sochna shuru kar diya aur agle din us situation ke mutabiq ek dummy dhun bana kar unhe sunaai jise unho ne bohat pasand kiya aur kaha ke main he is film ka music doon.
Question : Aap ki film “ Mere Brother ki Dulhan” is mein apka kaisa experience raha?

Ali Zafar: Mere liye to meri har cheez he ache hoti hai aur pasand aati hai chahe kisi ko pasand aae ya na aae. “Mere Brother ki Dulhan” meri kafi achi film hai,mujhe bohat pasand aai aur us mein kaam kar ke bohat he acha laga,bohat maza aya. Mere sath jo mere dosre stars bhi maujood hai us film mein. Bohat ache stars hai, un ke sath kaam kar ke acha experience raha. Dono ne mujhe kafi suppart bhi kiya. Bohat sari baton ka pata bhi chala dono ke sath kaam kar ke. Mera Imraan Khan aur Katrina Kaif ne bohat sath diya, kafi dostana mahaul mein hum ne kaam kiya. Dono stars apni apni jagah aehmiyat ke haamil hai. Lekin mere sath kaam karte waqt mujhe ye ehsaas nahi hone diya ke mujh se ziada experience stars hai hum. Dono stars qabil-e-tareef hai mere liye. Imraan Khan ke sath sath jo meri co-star hai Katrina Kaif unho ne bhi mere sath bohat ache se kaam kiya. Mujhe acha lagta hai bohat jab mujhe koi apna pan deta hai,dil se respect karta hai. Kyun ke humen ye sochna chahiye ke ek star hone ki hesiyat ke sath sath, sab se pehle hum ek insaan hai. Aur ek acha insaan wo hota hai jo samne wale ko bhi insaan he samjhe. Samne wale ki respect kare.

Question : Kya ap ki koi new album pipe line mein hai?

Ali Zafar: Main hamesha he apne music ke hawale se kaam karta he rehta hoon, lekin filhal filmon mein masroof hone ki wajah se aesi koi album pipe line mein nahi hai. Aam tor par do teen saal mein koi album le kar aata hoon.

Question : Aap bekwaqt actor, singer, music composer, song writer aur painter ho, itne sare kaam kis tarha kar lete hai?

Ali Zafar: Main artist hoon aur ye sab kuch mere takhleeqi izhaar ke muthtalif zaraey hai, muhe sirf takhleeq ka shauq hai, unhe sab baaton ko zehan mein rakh kar music create karta, gane likhta aur filmon mein adakari karta hoon.

Question : Pakistan aur Bharat ke talluqaat ke bare mein kya kahenge?

Ali Zafar: Jaise jaise aalmi masaiyl barh rahe hai, logon ke darmiyan nafraton aur larhai jhagron mein izafa hota ja raha hai. Wo ek dosre ka gala katne ke darpey hai aur dosron ko takleef pohncha rahe hai. Pakistan aur Bharat bhi isi dunya ka hissa hai, lekin mein samajhta hoon ke hum ne aapas ke tanazaat mein kafi waqt zaya kar diya hai, is liye aane wali naslon ko behtar mustaqbil milna chahiye.

Question : Aap Pakistan aur Bharat mein apne paristaron ko kya pegham dena chahenge?

Ali Zafar: Main to sirf ek baat janta hoon ke agar ap logon ko mohabbat denge to jawab mein ap ko bhi mohabbat milegi. Aur agar ap ke dil mein kisi ke liye nafrat bhari hogi to wo bhi ap se nafrat he karega. Main nahi janta ke log ek dosre ke sath mohabbat se kyun pesh nahi aate, jab ke humen is ki sakht zaroorat hai. Mohabbat karen aur mohabbat bantey. Is se ap bhi khush rahenge aur dunya bhi ap se khush hogi.

 

 

More Links

 

Copy Right 2012-2015 www.Meriduniya11.com