Header
Home>Interview  

 

 

 

 

Hina Khan

Hina Khan was born on 2, October 1987 (age 25 Years). She belongs to Muslim Family from Srinagar. Hina Khan says acting is my Aim. Hina Khan started her career from Indian Drama serial “ Yeh Rishta Kya Kehlata Hai ” in 2009. Hina Khan is very gorgeous and very talented actress. Hina Khan recieved 19th Awards for her best leading role in different Awards program. In this page you will read Tv Star Hina Khan Interview In Urdu and Roman Hindi

Hina Khan Interview

Hina Khan Photo

Indian TV mein jin adakaraon ne heyrat angez performance ke zariye apne fun ka loha manwaya hai, un mein aik naam Hina Khan ka bhi hai. Jo TV Star Plus ka popular drama serial “ Yeh Rishta Kya Kehlata Hai ” mein “ Akshara ” ka main leading role kar rahi hain. Muslim family se talluq rakhne wali Hina Khan ka koi filmi background nahi hai aur na he in ke khandan mein koi actor pehle se maujood tha. Yeh bhi nahi kaha ja sakta ke Hina ittefaqiya ya hadsati taur par actress ban gai. Woh zamanae talib-e-ilmi ka daur se he acting ke barey mein sochne lagi thi aur jaise he unhe mauqa mila, inho ne qismat aazmai karne mein dair nahi lagai aur raton raat gumnami ke andheron se nikal kar shohrat ke aasmaan par jagmagane lagi. Hina Khan ne character “ Akshara ” ki maqboliyat ke yeh aalam hai ke 2009 se ab tak use star parivar samet 19 awards mil chuke hain, jo ghaliban aik record hai, tahum un ka dawaa hai ke agar yeh show mazeed chalta raha to is character ke hisse mein aur bhi kae awards aaenge.

Question : Aap 2009 se is character “ Akshara ” ke hawale se musalsal awards hasil kar rahi hai, is kamiyabi ko kis tarha dekhti hain ?
Hina Khan : Deegar awards ko mila kar in ki tada 19 tak pohanch gai hai. Jin mein, New Talent Awards, Indian Television Academy Awards, Indian Tele Awards, Gold Awards, Global Awards aur Gr8 Awards bhi shamil hain. Is kamiyabi par main ALLAH PAK ka jitna shukar ada karon, kam hai. Aur main samajhti hoon ke is maqam tak pohnchane mein serial ke producer Rajan Shahi aur mere paristaron ka bohat barha hath hai. Jinho ne is character ko pasand kiya aur qadam qadam par meri hausla afzaai ki.

Question : Aap ne Akshara ka role Play kar ke gher mamooli shohrat-o-maqboliyat hasil kar li hai, go ke yeh ap ka pehla serial hai, lekin is ke hawale se ap ka shumar TV ki top artist mein hone laga hai. Yehi wajah hai ke log ap ke barey mein ziyada janne ke khuwahishmand hain. Kya ap apne background ke barey mein kuch batana chahengi ?

Hina Khan : Bunyadi taur par mera taluuq Srinagar ki aik Muslim family se hai. Hamara koi filmi background nahi aur na he khandan mein koi actor peyda hua. Albatta main ne humesha acting ko apna career banane ke barey mein socha aur yeh meri khushqismati hai ke Rajan Shahi ne mera intekhab kar ke yeh derena khuwahish pori kar di.

Question : Aap ko yeh Role Kaise mila ?

Hina Khan : Un dinon main Dehli mein thi. Jab mujhe kisi ne bataya ke is show ke liye auditions ho rahe hain. Chunache main bhi wahan chali gai aur unho ne mujhe main leading role ke liye select kar liya. Is ke bad asal masla ghar walon ko razi karna tha. Pehle to wo bohat naraz hue, lekin main ne kisi na kisi tarha walid sahab ko mana he liya.

Question : Ap ke pas na acting ka tajurbah tha aur na he acting background, phir ap ne kis tarha apne ap ko is character mein dhala ?

Hina Khan : Zahir hai ap jo bhi naya kaam shuru karte hain to us mein mehnat darkar hoti hai. Tahum yeh zaroor kehna chahongi ke Rajan Shahi ne jo bharosa kiya, us ki wajah se mujh mein aitemaad peyda hua. Main ne acting ki koi tarbiyat nahi li thi. Lekin unho ne apne taur par is character ki tayyari karwai thi.

Question : Ap kis had tak khud ko Akshara se relate karti hain ?

Hina khan : Kisi had tak main Akshara jaisi hoon, albatta kuch batein mukhtalif hain. Main aam zindagi mein bohat shokh hoon, jab ke Akshara aesi nahi. Isi tarha Laparwah aur apne waldain ki ladli bhi bohat hoon.

Question : Kya mustaqbil ke qareeb mein he shadi karne ka iradah kiya ?

Hina Khan : Ji nahi, filhal meri tawajjah kaam par hai aur is ke ilawa main kuch nahi soch rahi.

Question : TV industry mein aane ke bad ap ko koi pachtawa to nahi ?

Hina Khan : Bilkul nahi, main ne yahan reh kar aik aik lamhe ko enjoy liya hai. Mera wasta bohat ache logon se parha hai aur mujhe yahan par koi mushkil pesh nahi aai.

Question : App ki koi aesi baat jo dosre logon ko maloom na ho ?

Hina Khan : Mujhe rona bohat aata hai. Agar kisi dosre ki bhi ghalti ho to us par naraz hone ke bajae khud rone beth jati hoon. Chahti hoon ke kisi tarha apni is adat par control kar lon.

Question : Kya Aap mohabbat par yaqeen rakhti hain ?

Hina Khan : Ji haan, main aese shakhs se mohabbat karna chahongi, jo dil se mujhe chahe, madagaar ho aur meri izzat kare. Kyun ke mujhe roti dhoti zindagi guzarna pasand nahi.

Question : Kis producer ki film mein kaam karne ki khuwahish hai ?

Hina Khan : Rajan Shahi. Kyun ke main ne inhe ke sath apna TV career shuru kiya hai aur agar film mein kaam karna chaha to unhe ki movie ka intekhab karongi.

Question : Bollywood ka wo kaun sa actor hai, jis ke sath kaam karna chahengi ?

Hina Khan : Salman Khan.

Question : Kya ap arrange marriage par yaqeen rakhti hain ?

Hina Khan : Main is ke sath sath Love marriage par bhi yaqeen rakhti hoon, agar kisi se mohabbat ho gai to apne waldain ko bata dongi. Isi tarha agar unho ne mere liye koi larka talash kar liya to us par bhi mujhe koi aiteraaz nahi hoga.

Question : Kya aap ka koi boyfriend hai ?

Hina Khan : Abhi tak is neymat se mehroom hoon. Waise to kae logon ne dosti ka hath barhaya, lekin mere zehan mein jo boyfriend ka tasawwur hai, wo us par pore nahi utarte the.

Question Khan : Naye aane walon ko koi peygham dena chahengi ?

Hina Khan : Ji haan, Main un se yehi kahongi ke wo hamesha apne director ki baat ghor se sune, kyun ke wo ap ki behtri ke liye he sochte hain. Agar kabhi naraz ho ya gussa karen to use bardasht kar len. Kyun ke yeh bhi seekhne ke amal ka hissa hai.

 

 

 

 

More Links

 

Copy Right 2012-2015 www.Meriduniya11.com