Header
Home>>Interview  

 

 

 

 

Tina Dutta

Tina Dutta was born on 27 November 1986. She is very good and talented actress. she worked in Bangali film and TV drama as a child actress, when she was 4 years old. Now she is working in drama “Utran”, this is a very popular show. In this Page you will read Tina Dutta Interview In Urdu, Hindi and Roman Urdu.

Tina Dutta Interview

Tina Dutta Photo

Popular show Utran Drama se shohrat pane wali Tina Dutta ka character bhi ghaliban lap ki bhent charhne ko hai. taza tareen ittelat ke mutabiq anqarib is show mein 20 saal ka baad aane wala hai. jis ke nateeje mein kae characters khatam ho jaenge aur un ki jagah dosre characters le lenge, tahum Tina Dutta ki gher mamooli maqbooliyat ko dekhte hue use lap ke bad ek nae character mein mutaradif karwaya jaega. jo ke aage chal kar ek bar phir markazi shakal ikhtiyar karega. isi se andaza lagaya ja sakta hai ke Utran ke makers is show mein Tina ki maujoodgi ko kitna aeham jante hai or woh isi liye lap ke bawajood in ki jagah banane ka soch rahe hai ya industry ki rewayat ke mutabiq Tina Dutta ko bhi is shohrat ki qeemat tanazaat aur scandal ki surat mein ada karni parh rahi hai. Kabhi Reshmi Desai ke sath un ke tanazaat ki khabron ko uchala jata hai, to kabhi co-star Nandesh Sandho ke sath unhe link up kar diya jata hai. Taza tareen afwah ye hai ke unho ne producer Mahesh Kumar Jeswal se shadi kar li hai. Hum ne is interview mein Tina Dutta se inhe sawalon ke jawab janne ki koshish ki hai.

Question : Acting ki ibtedah kese hui, kya ap ko bachpan se he acting ka shauq tha ya ittefaqiya is field mein chali aai?

Tina Dutta: Main ne 4 saal ki umar se he as a child actress Bangali filmon aur Television par kaam shuru kar diya tha. 10th class mein thi ke Balaji telefilms ki janib se ek tele show mein kaam karne ki offer hui, lekin mere liye parhai ke lihaz se wo bohat aeham waqt tha, lehaza Dady ne mashwara diya ke mujhe apni taleem mukammal karne ke bad he kisi project mein hissa lena chahiye. 2 saal bad mujhe koi aane ko hai mein kaam karne ki peshkash hui, us ke bad mujhe Utran mein kisi look test ya audition ke bagher he cast kar liya gaya.

Question : Is mein koi shak nahi ke Utran ke bad ap ki zindagi aur career mein bohat barhi tabdeeli aai hai aur dekhte he dekhte ap ghar ghar pehchahni jane lagi ho, ye shohrat kesi lag rahi hai?

Tina Dutta: Waqai mujhe Utran se bohat shohrat mili aur is ki badolat dunya bhar mein mere paristaron ki tadad mein zabardast izafa hua hai. Yahan tak ke America mein bhi log mujhe Ikhcha ke naam se janne lage hai. Wahan se muhe kae bar bulawa aa chuka hai. Yeh koi mamooli baat nahi hai aur main ise bohat barhi kamiyabi samajhti hoon. Mujhe din bhar mein kae SMS, phone calls aur E.Mails mausool hoti hai. Zahir hai mere liye fardan fardan ek ke bad ek ka jawab dena mumkin nahi. Is ke bawajood bhi meri pori koshish hoti hai ke main apne kisi paristar ko mayoos na karon.

Question : Kaha jata hai ke kamiyabi ka nasha ap ke sar charh gaya hai aur ap set par zaroorat se ziada nakhre dikhane lagi hai, is bare mein kuch kehna chahengi?

Tina Dutta: Har actress ki khuwahish hoti hai ke wo screen par achi nazar aae, is ke liye mujhe kuch tayyari karni hoti hai, kuch cheezon ki zaroorat hoti hai, ye mera haq hai ke un cheezon ki demand karon aur aesa karne par mujhe nakhron ki malka ka khitab de diya jata hai. Utran ka shumar TV ke no.1 shows mein hota hai to mujhe is ke meyar ko barqarar rakhne ke liye pori tayyari karni hoti hai. Lehaza agar mein show ki behtari ke liye demand kar rahi hoon aur is ki wajah se mujh par nakhre karne ka ilzaam lagaya jata hai to mujhe is ki parwah nahi.

Question : Aap ke bare mein ye bhi suna gaya hai ke set par der se aati hai, kya ye sach hai?

Tina Dutta: Dekhe hum sab insaan hai thori bohat der to ho he jati hai. Ap pichle 2 saal ka record dekh sakte hai, hamen subha 9 baje set par pohanchna hota hai aur 10 minute der ki gunjaish thi. Kae martaba aesa bhi hua ke main 7:30 par he pohanch gae to unho ne kaha main waqt se pehle kyun aai hoon. Is liye mujh par der se ponachne ka ilzaam barha he ajeeb hai. Aesi baat nahi hai ke hum waqt se pehle ya kuch der bad nahi aa sakte, agar is wajah se kuch log mujh par ilzaam tarashi kar rahe hai to main is bare mein kuch nahi kar sakti. Agar kabhi der hui bhi to yaqeenan us ki koi na koi maqool wajah hogi. Mujhe yaad hai ke ek dafa mera accident ho gaya tha jis ki wajah se mujhe set par pohanchne mein der ho gai thi, us ke bawajood main ne shooting mein hissa liya. Ek dafa mujhe tez bukhar tha, phir bhi main shooting ke liye aai aur main ne aese har mauqe par unit ke logon ko barwaqt matlaa kar diya tha. Is ke bawajood log mere bare mein aesi baten phela rahe hai to main kya keh sakti hoon.

Question : Utran ki co-star Reshmi Desai ke sath bhi ap ke ikhtelafaat ki khabren media mein chati rehti hai, in mein kahan tak sadaqat hai?

Tina Dutta: Main record ki durustigi ke liye wazeh tor par keh dena chahti hoon ke Reshmi ke sath mera koi jhagrha nahi, wo meri behtreen dost hai. Hum ikhatte shopping aur partiyon mein jate hai. Mujhe herat hai ke media ke logon ko ye sab nazar nahi aata aur wo yehi sabit karne par tule hote hai ke hum dono dost nahi balke dushman hai.
Question : Goya aap ye kehna chah rahi hai ke in khabron mein koi sachai nahi hai?

Tina Dutta: Ji haan, agar meri baat par yaqeen nahi to ap meri hair dresser se poch sakte hai. Wo ap ko bataengi ke ham dono main kitni gehri dosti hai. Baat darasal ye hai ke jab aap kamiyabi ki taraf barh rahe hon to log aap ke bare mein jhoti sachi khabren phelana shuru kar dete hai. Jab ke haqeqat ye hai ke is tarha ki afwahon se hamari shohrat mein izafa hota hai, lehaza main bhi in baton ko ek kaan se sun kar dosre se nikal deti hoon.

Question : Aap li zaati zindagi ke bare mein bhi media mein bohat kuch likha gaya hai, bilkhusoos co-star Nandesh Sandhoke sath link up ko bohat ziada publicity mili, ye batae Nandesh aur Reshmi ki shadi ka sun kar ap ke dil par kya guzri?

Tina Dutta: Aap sirf ek link up ki baat kyun kar rahe hai. Mera talluq to bohat se logon ke sath jurha hai. Sirf Nandesh he nahi bal ke is list mein Rohit Khurana aur mere tamam co-actors ke naam shamil hai. Lekin mujhe is baat se koi farq nahi parhta. Kyun ke main ne koi aesa kaam nahi kiya hai jis se mujhe sharmindagi ho. Nandesh ke sath meri shuru se he bohat achi dosti rahe hai aur mujhe bohat khushi hui jab maloom hua ke in ki shadi Reshmi se ho rahi hai. Wo ek dosre se bohat mohabbat karte hai aur main un ki khushgawar azdawaji zindagi ke liye duago hoon, mujhe un ki jorhi bohat achi lagti hai. Mere aur Nandesh ke dauran kabhi aese koi baat nahi hui. Daily soap mein un ke sath pair zaroor banaya tha aur log usi ko dekhte hue ghalat fehmi mein mubtila ho gae. Wo yehi samjhe ke jis tarha Veer ( nandesh ) aur Ichcha yani ke main TV screen par ache lag rahe hai, is liye haqeeqi zindagi mein bhi in ki shadi ho jani chahiye. Aap kisi ki soch par pehrey nahi betha sakte agar logon ne is soch ki bunyaad par hamara talluq jorh diya to main is silsile mein kya kar sakti hoon, siwae is ke k hum pehle bhi ache dost the aur ab bhi hai.

Question : Aap ke bare mein ek khabar aur bhi in dono media par gardish kar rahi hai ke ap ki shadi koi aane ko hai ke supervising producer Mahesh Kumar Jeswal ke sath ho gae hai ya hone wali hai, is bare mein aap kya kahengi?
Tina : Behtar hoga ke aap ye sawal na karen, main is ka jawab nahi dena chahti.
Question : Kya main aap ki pareshani ki wajah jaan sakti hoon?

Tina : Agar muamlah meri zaat tak mehdood ho to main bohat kuch bardasht kar sakti hoon, lekin is tarha ki manfi khabron ka asar meri family par bhi parhta hai. Main unhe mutmaiyn karti hoon magar parhosi aur rishtedaron ki zabani is tarha ki khabren sun kar pareshan ho jate hai. Kitni ajeeb baat hai ke jab mere bare mein koi achi baat likhi jati hai to koi mere ghar walon ko mubarakbad dene nahi aata, lekin manfi khabren parh kar tanz karne chale aate hai. Main ne kae awards jeeten hai, lekin kabhi bhi koi meethai le kar nahi aya, halanke sab jante hai ke awards hasil karna kitna mushkil hota hai.
Question : Masroofiyat barh jane ke bad ap ki social life kis had tak mutassir hui?

Tina Dutta: Sach to ye hai ke main apni family ko bilkul waqt nahi de pa rahi, kae kae din ho jate hai waldain se bhi baat nahi ho pati. Walid phone kar ke shikayat karte hai ke ab main barhi star ho gai hoon aur mere pas un ki call wasool karne ka bhi waqt nahi hai. Waqai mujhe us waqt barhi sharmindagi hoti hai ke shooting mein masroof hone ki wajah se un se baat nahi kar pati, is liye wo jhunjhulahat mein aesa keh jate hai. Lekin janti hoon ke unhe meri majbooriyon ka ehsaas hai.

Question : Jab aap apne shehar culcutta jati ho to wahan bhi ap ki pazeerai barhe star ki tarha hoti hai?

Tina Dutta: Mujhe ghar jane ka waqt bohat kam milta hai. Ek dafa apne School gai to tamam students mere nazdeek jama ho gae aur autograph ki farmaish karne lage. Us hujoom mein mere liye saans lena dushwaar ho raha tha. Us hungama aaraai mein School ke furniture ko bhi nuqsaan pohncha.

Question : Kafi dinon se ye khayal zahir kiya ja raha hai ke aap is show ko chorne wali hai. Kya nahi samajhti ke agar aesa hua to aap ki audience ka dil toot jaega?

Tina Dutta: Aesi koi baat nahi hai, agar mujhe ye show chorna he hota to itne saalon se mein is mein kaam na kar rahi hoti. Main yahan kaam kar ke bohat khush aur mutmaiyn hoon. Unit ke sabhi log kafi ache hai aur mera bohat khayal rakhte hai. Sab se choti hone ki wajah se mere bohat laad uthae jate hai aur sab log mujhe bachon ki tarha chahte hai. Main bhi khoob masti karti hoon aur bacha samajh kar meri shararton ko nazar andaaz kar diya jata hai.

Question : TV ki har adakara chote pardeh par kamiyabi hasil karne ke bad Bollywood ki filmon mein kaam karne ke khuwab dekhna shuru kar deti hai, kya aap ki bhi agli Manzil Bollywood Movie hai?

Tina Dutta: Filhal main ne is bare mein nahi socha, apne maujooda maqam se mutmaiyn hoon, lekin kal ke bare mein kuch nahi kaha ja sakta.

More Links

 

 

More Links

 

Copy Right 2012-2015 www.Meriduniya11.com Contact Us